Kryeministri i vendit, Albin Kurti e ka quajtur ditë historike këtë të sotmen në Davos, pas nënshkrimit të Marrëveshjes së Tregtisë së Lirë me shtetet anëtare të Shoqatës Evropiane të Tregtisë së Lirë (EFTA).

Kurti thotë se Kosova është vendi i vetëm në rajon që me shtetet e EFTA-s ka marrëveshje edhe për tregti të mallrave edhe të shërbimeve.

“Ajo paraqet kapitull të ri të forcimit të lidhjeve dhe shkëmbimeve ekonomike ndërmjet republikës sonë dhe Islandës, Lihtenshtajnit, Norvegjisë dhe Zvicrës, mundësi të madhe për prodhuesit dhe kompanitë vendore si dhe shtysë të fuqishme për zhvillimin e hovshëm ekonomik të vendit”, shkruan Kurti në Facebook.

Kryeministri ka falënderuar qeveritë e shteteve anëtare të EFTA-s dhe ministren e Tregtisë, Industrisë dhe Ndërmarrësisë, Rozeta Hajdari për angazhimin e madh e me mirëbesim të plotë deri në arritjen e kësaj marrëveshje.

“Falënderoj qeveritë e shteteve anëtare të EFTA-s dhe ministren tonë të Tregtisë, Industrisë dhe Ndërmarrësisë, Rozeta Hajdari për angazhimin e madh e me mirëbesim të plotë deri në arritjen e kësaj marrëveshje, nga e cila jemi të bindur që do të përfitojnë bizneset, industritë dhe qytetarët e vendeve tona”, shkruan Kurti./Arbresh.info/